Duvenstedt un dat Lichtermeer

Plattdeutsche Geschichten

Wat weer dat scheun, as in de Wieh-nachtstied dat Lichtermeer de Lüüd op positive Gedanken bröcht hett. Dank an den Verein Duvenstedt aktiv.

Dat Duvenstedter Orchester von der Vereinigung Duvenstedt hett speelt, un Jung un Alt sünd tosoomen am Kreisel in goode Stimmung komen.

Dat heet, ok in Duvenstedt blift de Tied nich stohn un verännert sik rasant. Wat güster weer, dat tellt nich mehr. Wat nu?

Tosomenholln is ansegt un Umwelt schonen, anners hebt wi keen Tokunft. Sparsamer mit de Energie ümgohn un bescheidener leven. Vom Auto op Fahrrad stiegen, dor fehlt de seekeren Radwege – dat mut sik ännern. De örtlichen Geschäfte ünnerstützen, anner goht se kaputt un de Lichter goht ut. Uns öllere Hüser oprüsten, anners ward se museumsriep, dorför de Handwarksbedrieve hoch holln.

De jungen Lüüd schüld nich so veel op Handy daddeln un mehr den Hammer in de Hand nehmen. Lebensmittel von örtlichen Landwirten op Markt köpen un sik den Buck nicht to full hauen.

Ehrenamtliche Tätigkeiten stärken – Sport un kulturelle Veranstaltungen levt dorvon.

Vorschriften hebt wi veel to veel. Weniger un verständlicher weer beeder. De Bürokratie bremst uns ut, dor möt wi uns nich von umhauen loten.

Am Stammdisch goode Ideen entwickeln un ümsetten. Gemeinsam Feste fiern! Veele goode Vorsätze nich glieks wedder fallen loten – dat bringt wat. Allns sutje angohn loten, un den Stress den Rüch kehren.

Wi hebt dat in de Hand, mit Optimismus Duvenstedt jümmer to een Dörp mit Freid to moken.
Duvenstedt is 1261 schriftlich dokumentiert un hett sik komodig entwickelt. Dat schall doch mit den Dübel togohn, wenn dat nich so wiedergeiht. Wi hebt hier allns, wat man to`n Leven brukt. Im Duvenstedter Kreisel kannst nolesen, wo dat Leven in Duvenstedt pulsiert.

De plattdütsche Sprook wült wi pflegen un mit uns Kinner, wo geiht, Plattdütsch snaggen, anners geiht de Sprook ünner.

De Lichter in Duvenstedt schüld wieder löchten, nich utgohn, un de Lüüd glücklich moken.

Hinni Jürjens