Nu hebt wi den Salaat: das Corona-Virus

Mit sowat hett keen een gerecht, de Corona-Virus geiht krüüts un quer üm de Welt.

De Böhm wachs nich in Heben. Wat nu?
Een is klooker as de anner!
De olen Lüüd segt, no den Weltkrieg weer allns noch leger, kannst jüst nich verglieken, dor weer allns in Schutt un Asche. Nee anfangen, keen Jammern, in de Hannen spucken, hett dat heeten. Kantüffeln planten, Heuhner un Kaninken obtrecken, Holt sammeln, de Trümmer wegrümen un de Hüüser nee obrichten. 75 Johrn güng dat bi uns jümmer wunnerbor bargob.

Ob de Umwelt is nich veel Rücksicht nohm worden. Ut de Eer sünd öberdusende Liter Öl ruutpumpt worden, för een komodiges Leben, allns verfüert un in de Luft pufft. Dat is nich good für de Natur. Dor mut erst eene Corona-Krise komen, dat de Menschen nodenkt un wat ännert.

De Wirtschapp geiht in de Knee. De Stoot schall helpen, Schulden ohn Verstand mooken. Dat is so, as wenn wi uns sülben an de Hoor ut den Sumpf ruttrecken wöllt. Mööt wi leever wedder in de Hannen spucken un sehn, wo wi dor wedder rutkommt?

Nee anfangen, bescheidener warrn. Von Auto ob dat Rad ümstiegen, Urlaub in eegen Land moken, nich so veel fleegen. Flugpersonol, wat nich mehr brukt ward, ümschulen. Eegen Naturprodukte kööpen. Medikamente sülfs moken un nich ut China holln. Digitalisierung als Help ankurbeln, de brukt veel Strom, mutt ut Wind un Sonne mokt warden. Öberdreite Vörschriften müt weg , sönst duert allns veel to lang.

Wat hebt wie för een groote Chance, een neen Anfang to moken. Umweltfründlich, dat bedüüd veel Arbeit, de vör uns steiht. Wenn wi de optimistisch anpackt, ward dat wedder wat.

De Dooden ut den Weltkrieg hebt uns warnt Freeden to holln. De Dooden von de Corona-Krise schüllt nu Warnung wesen, wi mööt bescheidener warrn un de Umwelt schonen, denn geiht dat wedder bargob. Wi hebbt Arbeit un wi komt ut den Salaat wedder rut. Allns Goode für de Tokunft.

Hinni Jürjens