De Lüttbohn von Wohldörp bit no Rahlstedt
Plattdeutsche Geschichten
Groote Errungenschaft för Duvenstedt, Lemsahl un Wohldörp weer am Himmelfohrsdag, 9. Mai 1907, de Eröffnung der elektrischen Kleinbahn von Wohldörp bit Rahlstedt för de Beförderung von Personen und Gütern über Rahlstedt un wieder torück mit de Isenbohn no Hamburg oder Lübeck. Dat hett hier veel verännert. De Hamburger keem to´n Wochenend in de Wirtshäuser, kööpen Grundstücke un siedeln sik hier an. 1925 is de U-Bahn bit no Ohlstedt verlängert worden. För de Lüttbohn is de Streck von Ohlstedt no Wohldörp öberbleeben. Mit de Lüttbohn dörch den Wohldörper Wald weer den 36 Johrn een besünneres Vergnögen. Veele Erinnerungen hebt de ölleren Lüüd an de romantische Lüttbohn noch.
As Kinner sind se mit de Lüttbohn to School föhrt.
De erste Fohrt mit ehr Mudder an de Hannen mit de groote Schooltüüt. De Schaffner kennt ehr Fohrgäst, jedeen segt „goden Morgen“. He pett tweemol ob den Bimmelknoop, kiekt ob doar noch een kömt, dreiht de Kurbel no rechts un de Triebwogen mit een Anhänger fohrt los dörch den Wald no de Tannenallee. Am Kupferredder sett he de Schoollkinner aff mit den Snack „greut juch Lehrers“ un fohrt wieder no Ohlstedt, wo veele Lüüd mit de U-Bohn no Hamburg föhrt.
De Schaffners harrn Tied un weern fründlich.
Dree Minuten loter fohrt noch een Triebwogen as Lumpensammler achteran. In Ohlstedt sett sik de Schaffner in de lütte Bude, drinkt Kaffee un schmökt een Piep.
Tüchwerts treckt de Lumpensammler den Hänger wedder no Wohldörp. Wenn ob de Wohldörper Schlüüs Danz ob de Deel weer, segt de Musikers an, dat de letzte Lüttbohn in 15 Minuten abföhrt un de Lüüd löpt no de Lüttbohn. Himmelfahrsdag fohrt se mit twee Hängers mit Musikers an Bord in goode Stimmung dörch den Wald.
Dumm Tüch mit de Lüttbohn
As wi as Kinner grötter weern, harrn wi uns Spoß. Wenn wi in Stimmung weern, hebbt wi mit 8 Mann achtern ob den Perron wippt, de Bohn füng an to schaukeln un de Schaffner hett schimpft. He bremst aff, dat de Bohn nich ut de Gleise spring deit. Doar weern de Handweichen, de wi as Jungs ümstellt hebbt, doar müss de Schaffner anholln, utstiegen un se wedder richtig ümstelln. Doar hebbt wi Groschen ob de Schienen legt, denn rummelt de Bohn doar öber weg un de platten Groschen hebbt wi insammelt. Veel Spoß harrn wi, wenn wi de Munition von de Knallpistole ob de Schienen legt hebbt un de Bohn mit peng, peng, peng doaröber suust is.
1961 is de Lüttbohn stilllegt worden.
Dat güng nich so wieder, nee Vörschriften hebbt den Spoß vermasselt. De Lüttbohn ümtorüsten, weer to düüer; doar is de Verkehr ob Busse ümstellt worden. Twee Schaffner hebt sik twee Arbeitshänger as Gartenlaube in ehrn Garden stellt. Später as Wittfroo hebt de Schaffnersfroon den Garden an den Forst verköft. De Förster wull de Hängers mit de Kettensog tweimoken. Dat heff ik mitkreegen, de Hängers mit een Bagger ob een Tieflader setten loten un een Warkstee hett 1987 een Gestell mit Gummiräder ünnermokt.
Erinnerung an de Lüttbohn
As se de Stilllegung besluten hebt, hett sik gau een Lüttbohnverein gründ un Spenden sammelt to`n Erhalt der Lüttbohn. De Hamburger Hochbahn wull dat nich un hett den Bahnkörper fix affbuet – nu is de romantische Streck een Wannerweg. Een Gebäude vom Wohdorfer Bahnhof hebt se rett. He is as Kleinbahnmuseum inricht worden, ward to Tied renoviert un is bald wedder to Besichtigung frie. In Duvenstedt, Lemsahl un Wohldörp hebbt sik veele Familien mit Kinner ansiedelt, de de romantische Lüttbohn nich mehr kennen dot un in dat Museum sik een Bild von er moken könt. Mit een Trecker treck ik nu de renovierten Bohnanhänger meist mit Kinner bin dörch uns scheune Gegend un vertell Geschichten von de Lüttbohn. De Hänger sünd von 1928; im Winter hebt se dürch een Trichter Solt ob de Schienen streut, so hebt se „Soltwogen“ (Salzwagen 21) doarto segt.
Siet 30 Johrn is dat in Lemsahl Tradition, dat ik de seuten Kinner to Inschoolung von de Kark mit jümmer Schooltüten no de School in Begleitung der Polizei mit min Soltwogenhängers heel suutje mit den olen Trecker fohr. Doarbi vertellt manch Opa, wi he mit de Lüttbohn dörch den Wohldörper Wald to Inschoolung fohrt is. Un nu vertellt mi de Öllern von de Kinner, dat ik se ok all mit min Trecker to Inscholung dörch de Gegend fohrt heff. De Heimatbund Lemsahl-Mellingstedt organisiert de Fahrten un erinnert so an de Lüttbohn un de Kinner hebt ehrn Spoß.
Hinni Jürjens
